جدتي حصيصه تقولكم تعآلو ..~

السلآم عليكم ~
مسآكم الله بالخير والرضآء
الله حيهم شنبآت وبنآت عبير
أن شآء الله أنكم بخير وأموركم تمآم
طبعآ أكيد بتعرفون جدتي حصيصه وش تبي فيكم ..؟!
هذا الله يسلمكم كنا في بيت جدي والعيله كلهآ نايمه باإشتثنآء شيبآن العائله
عآد جدتي مآهو عاجبهآ وضعنآ سهر للصبح ونوم للعصر .،وكنت نآيمه أنا وخالتي وبنآت خالاتي وخوآتي
وجت تهآوش ~} أوب جديد هي دآيم تهآوش عند النوم
الهم قآلت أنتن طول الوقت متجعفآت ونايمات قومن
أنا من فتحت البآب حسيت فيهآ عآد يوم قالت متجعفات وأنا أموت من الضحك ~} أحد يضحك وهو نآيم
المهم يوم صحصحت سألت جدتي قلت جده وش متجعفآت ..؟!
وتبدآء تقب من جديد أنتن طول الوقت نايمات وحالتكن حاله لا أكل زي النآس ماغير تاكلون من هالدعافيس اللي مامنها فايده ....)
قعدت تهاوش وبعد ماخلصت قالت معنآهآ متبطحآت ونآئمآت
ودعآفيس : أي الشيبسات والبسآكيت والاشياء هذي ( لهآ أكثر من معنى وتقال حسب الشي الموجود)
.،
فمن هالحآدثه حبيت أن يكون موضوعنآ هذآ عن جميع المصطلحآت الشعبيه القديمه اللي بدت تتلاشى واللي كآنت تذكر ومآزآلت تقال عند جدآنا وجدآنكم
يعني كل وآحد فيكم يدلي بدلوه وكل المصطلحات الغريبه أو المعروفه لدى مجتمعه .، منهآ نتعرف على معنى هالكلمآت
ونشوف الأختلاف والتقآرب بين بعضنا البعض
.،
وأنا رآح أبدء ببعض اللي أعرفهآ وأسمعها

الهمام

يعني بسرعه ، وانجز الشي اللي تسويه ، ولا تصير ميت بشغلك


بليه أو ماخوذ

يقولها الواحد ، اذا مل من اللي قدامه ويبي الفكه منه

السحله أو الغضاره

اناء دائري ، يشربون فيه من اول المويه واللبن

جغمه

الجغمه هي ، زي الرشفه يعني بالشرب تنقال

أمرح

يعني نام وخمد ، فلان امرح عندنا ، يعني رقد ونام

الأطخم

بذاك الوقت ، المزايين يسمونهم طخمان


بالطقاق

يعني ، بقريح واللي ما يحفظك طس

مطفوق او مخروش

يعني يحب العجله ، وكل شي عنده بسرعه

دوك

يعني خذ الشي ، (دوك مفتاح البيت)

الحصير

وهو الفرش اللي يزين من خوص النخل .. ويسوى منها فرش للجلسه

ثوب الكرته

يكون مزموم مع الصدر وسيع يخقل

مسباح

وهو يكون زي السلسال حول الرقبه بس انه عريض شوي

القلاده

وتكون كبيره واكبر منهن كلهن

الرشرش

كبيير يكون على الصدر كله

الغوايش

ويجون يصفونهن بيديهن 12 حبه باليسار و12 حبه باليمين للناس اللي ربي مغنيها

اما الناس اللي على قد حالها يا ست في كل يد او اربع

الرحى

يطحنون به الحبوب من حبوب السنبل وغيرها


هذآ اللي عندي اللحين .، أبيكم تذكرون كل شي من أمثآل .، مدح هجآء رثآء .،أدوت طبخ زينه أستعمال باآي شي
كل شي تذكرونه قوله .، ولا تخلون في جعبتكم شي

.،

طبعآ للأمانه الفكره فقط منقوله لكن القصه الكلام والحتسي اللي فوق من جعبتي باأستثناء بعض المصطلحات اللي تقال عندنا لقيتها جاهزه وجبتها

.،

الهدف من الموضوع:
1/ إحياء موروثنا الشعبي
2/التعرف على بعض المصطلحات اللي نسمعها ونجهلها
3/نوسع صدورنا شوي .، وننشط قسم العام

.،

خيتكم الطخمه / مطنوخة جهينه

دوكم هذي لكم

هيآ أنطلقو على بركة الله

هههههههههههههههههههههههه مشكورة اكتير نونو المو ضوع حلو اكتير